Хоамо яхачох, 99% балхаш даь даьннад; цу даькъе кораш, наӀараш, йӀовхал чуйиллар, вентиляци, иштта хий дӀаухийташ йола моттиг, трансформатор латта подстанци, канализаци, хий чудиллара балхаш а долаш. «Гарант» яхача фирман гӀишлонхой карарча хана технически оборудовани дӀаоттаеш ба, иштта йистедоахаш латт чура балхаш а арахьара доазув чудерзадар а.

Цар яхачох, цхьан бетта уж балхаш а йистедаргда, керда спортивни комплекс кийча хургья. 300 миллион сом федеральни бюджетера ахча, «ДегӀаахар» яхача къаман проекта чудоагӀаш, дӀадахийтад спортивни комплекс хьалъеш.

Керда комплекс хьалъеш я хьалха хинна кхоачамбоацараш юкъера дӀа а доахаш. 2022 шера ГӀалгӀай Республикан Кулгалхо Келаматанаькъан Махьмуд-Ӏаьла ваха хилар къаьнарча гӀишлонга хьажа, цо берашта эшаш дола хьалаш цу чу цахилар белгалдир цу хана. Цудухьа керда гӀишло хьалъе лаьрхӀар. Шин шера хьежар зехьа довнзар, ер шу йистедоалаш цо тӀаэцаргба, хӀанзарчоа ишкола секцешка ухаш хиннараш.

Эггара чӀоагӀагӀа доаккхал де мегаргдар да, цу гӀишлон чу 200 квадратни метр совгӀа бассейн хилар, 25 метр бӀаьха биъ никъ а болаш, иштта духьалений оаса ба цу чу, спортсмений даьшта лаьрхӀа трибунаш а я. Цул совгӀа, ФОКа чуйоагӀаш я латара залаш, спорта, тренажера залаш, фитнес-центр, барзкъа хувца, хьалъолла моттиг, лорий кабинеташ, кхы а дукха таронаш. Юкъара дӀалоаца моттиг 1, 25 гектар я, хӀаьта цу тӀа хьалъяь гӀишло ше 3763,80 квадратни метр хул.