Футбол езарий Лиган чемпионате, котало яьккха футболисташ безбир Шолжа-Шахьаре
Нохчий мехка дӏайихьача футбол езарий Лиган чемпионате котало яьккха футбола тоаба тӏаийцар Шолжа-Шахьаре. Из хоам «Сердалога» бир мэре зарбан болх лелабеча Батиганаькъан Хьавас.
Коталонца даькъалабувца мэре хьабийхар беррига футболисташ шахьара кулгал деча ӏумаранаькъан Аслана, шахьара депутатий Кхела кулгал деча Оздой Ингисхана. Иштта цар хьавийхар «Реал Шолжа-Шахьар» яхача тоабан тренер Янусайнаькъан Мухьмад.
Шахьара дас белгалдир, дикача оагӏорахьа шоаш дӏагойташ уж хьабоагӏилга, укх кхаь шера. Гӏалгӏайчен Кубкага кхаьчаб уж (2022-ча шера 2 моттиг, 2023-ча шера - 3). Тренера дийцар дӏахойодача хана шоай кхоачашде дезарех, иштта хӏанз хьатӏадоагӏача шоатта дийнахьа хила дезача ловзарах а.
«Шо массаболча кагирхошта хоза масал хьокхаш да, спортаца бувзам лоаттабар мел лоархӏаме да дӏагойт оаш тахан. Шун тоабанна эшаш долча хӏаманна тӏехьа гӏо де кийча ва со», - аьлар шахьара дас.
