Шолже, ер шу чакхдоалаш, тилла даргда керда тӏий
Шолжа-Шахьаре, керда тӏий хьалдеш, болх дӏахьош ба. Доал деча даькъ тӏарча кулгалхочо ӏумаранаькъан Аслана ше тӏахьожам лоаттабу цу гӏулакха. Из лаьрхӏа да шахьара хьалаш тоадара, иштта наькъа кхерамзле хилийтара.
«Таханарча денга цига къахьегарий кийчон балхаш чакхдаьлар. Бетона кӏийле яь яьннай, цох хургья цун лард. Кастлуш керттера болх дӏаболабергба тӏий чӏоагӏа хургдолаш когаш дергда, тӏаккха царна бетон чуйоттаргья. Дӏахо бе беза болх ба хий чакхдалара оагӏув кийчъяр, гӏашлошта наькъаш хьадар шин оагӏорахьа. Керттера гӏишлон балхаш чакхдаьнначул тӏехьагӏа, лоравалара карташ а хьалъергья, наькъа оасаш доахкаргда», - аьлар Шолжа-Шахьара администраце «Сердало» газетага.
Керда инженерни гӏирс бӏаьха ба 50 метр, шера - 12 метр, из болх дӏахьош ба наькъа кхерамзле йолаш, деррига хьалаш чудоагӏаш хургболаш.
Из тӏий хьалдеш да шахьара хьалаш хьакхоллара, уж массайолча оагӏорахьара дегӏадоаладара йолча программах. Гӏишлонхоша болх, ер шу чакхдоалаш, беррига йистебаккха лаьрхӏад.
