ВӀаштӀара даь цӀа хьалдеш, кхоачамбоацараш далийтад Шолжа-Шахьаре
Шолжа-Шахьарерча Менделеева цӀерах болча урам тӀа вӀаштӀара даь цӀа хьалдеш, кхоачаш ца деш дитараш гучадаьлар тӀахьожаш хиннарашта. Из хоам «Сердалога» бир Ӏаьдала болхлоша.
«РостехтӀахьожама, ГосстройтӀахьожама, ГӀишлошта тӀахьожам лоаттабеча инспекце, мэре, иштта кхыболча цу оагӀонцарча болхлошта гучадаьлар цӀен подъездашта лакхе кхерамзлен хьал лорадеш дола гӀирсаш доацилга, подвалий гонахье чуерзаяь йоацилга, цхьацца йолча моттигашкара болх чакхбаккханза болга, цул совгӀа лифт а йоацилга, кӀалхарча гӀата наӀараш латтац, иштта фо чудайташ, кӀур дӀаараозийташ дола гӀирсаш оттаданза да.
Хьалха «Муниципальни сахьат» яхача программага гӀолла шахьара даьга Ӏумаранаькъан Асланага дийцар цу дерригача кхоачамбоацарех № 50 йолча цӀен 1-ча гӀишлон яхархочо. Цу цӀагӀа бахаш болча наьха бокъонаш меттаоттаеш, боаггӀача боараме гӀулакх чакхдаккха, уж деррига кхоачамбоацараш юстардаха лаьрхӀа ба хьакимаш.
