Берашка наькъашкарча кхерамзленах дийцар Солдунов Валере
Берашта, кагирхошта наькъашкарча кхерамзленах дувцаш йола кхетаче дӀайихьар Магасе. «ХӀарма» яхача оагӀонцара, Россе моттигерча МВД болхлоша, дешареи Ӏилмани министерствос гӀо деш, дӀахьош болам бар из.
Бераш машинашцарча хатарех лорадеш болча оагӀон болхлоша, уж Ӏомабеш дола гӀулакх дӀахьекхар ловзара хьисапе. Кхетаче дакъа лоацаш хилар вай мехкарча тайп-тайпарча моттигашкара 50 совгӀа бер.
Из болам дӀабахьа эттача РФ Юкъарча палатан доакъашхо волча Солдунов Валере белгалдир, иштта йола кхетаченаш, бераш наькъашкарча хатарех лорадеча лоархӀаме йолга.
«Проекта керттера декхар - берашта наькъашкара бокъонаш йовзийтар, уж лархӀа Ӏомабар. Бераш хатарех лорадара тӀехьа болх дӀакхахьар, вайна массанена лоархӀаме да тахан», - белгалдир Солдунов Валере.
Иштта цу кхетаче дакъа лоацаш хилар берий бокъонех йола викал Чахкенаькъан Зарема, Республикерча МВД Юкъарча Совета секретарь вола Арсамаканаькъан Хьусен, Магасерча Россе МВД ОГИБДД оагӀон хьалхалатта полице майор Гаьгенаькъан Тимур. Кхерамзленца дувзаденнараш довзийташ, наькъашкара бокъонаш лархӀа бераш Ӏомадеш йола лоархӀаме проект я из.
