Магӏалбика ӏаьдало теркалдир бахархой дехар
Гӏалгӏайчен мехка доал дар Центре, Магӏалбик-Шахьара Шаденаькъан урамах бахача нахагара дехар дера. Уж раьза бац цу шахьара доазон тӏарча лостама. Шоаш кхайкарал деш, цар белгалдир цигара цхьацца дола кхоачамбоацараш, уж бахьан долаш шоай вахара хьалаш лоха хилар белгалдеш. Цар терко тӏаяхийтар наькъаш а дикача хьале цахилара.
«Из хьал тахкара цу моттиге вахар Магӏалбик шахьара администраце кулгалхо Галай Муса. Цунца вар гӏонча Мержой Батыр, иштта администраце балха отдела говзанча»,- аьлар «Сердало» газетага Магӏалбикерча шахьара администраце зарбан болх лелабераша.
Цига хьежачул тӏехьагӏа, Галай Мусас аьлар, деррига белгалдаьха кхоачамбоацараш юстардоахаргда, хӏаьта Шаденаькъан урам тӏа де деза балхаш дӏадоладергда, хаоттам кӏеззига дикагӏа болча хана.
