Iаьдало новкъостал ду наьха хьалаш аттача дахара
Республика кулгалхочун администрацеи правительстваи наьха хьашташка хьажара йолча управлене нах тIаийцар ГIалгIай республика правительства кулгалхо волча Сластенин Владимира, — аьнна хоам бу «Сердало» газетага министрий кабинета пресс-службо.
Массехк саго заявлени яьзъяьяр тайп-тайпара хьашташ кхоачашде гIо дехаш. Цу тайпара заявлени яьзъяьча Iаьлий-юрта яхаш йолча Кукархой Маржана новкъостал де аьнна лаьрхIад. Цун дезале 7 саг ва (из шеи, 5 бери, цIендаи — шоллагӏча группа заIапхо вола). Уж бахаш ба вагончикача. Цу дезала блоках хьалдаь цIенош чакхдахара гIишлон материалашца Iалашо е лаьрхIар.
МагIалбике яхаш я Хамчинаькъан Iашат. Из бараке ях кхаь бераца, царех шиъ хьалхарча группа заIапхо ва. Цул совгIа, кхалсаг ше а я онкологе лазар долаш. Iашата ийца лаьтта да, цхьабакъда, цIенош хьалде таро яц цун. Республика къахьегама министерстве гIолла паччахьалкхен социальни контракт дIачIоагI а яь, этта хьал тоадара гIо де лаьрхIар цунна.
ГIажарий-юртарча Героева Заремай заявлени а тахкар. Республика Iилмани дешареи министерства, къахьегама министерства тIадиллар цун бераш берий беша дIачудала новкъостал де, аьнна. Иштта Заремаи цун цIен-даи шоаш бахача балха оттабе, аьнна а.
Республике гIолла йолча «Кавказ» яхача Федеральни машений наькъа управлененни, Iалама министерстваи тIадиллар Буро кIала вахаш волча Малсаганаькъан Тимура технически хьалаш кхоачашдар. Цун чулоацам иштта ба: дIадахача шера май бетта чIоагIа дийлхача догIаша Наьсар оалача хи тIа яьча чIоагIон цхьа дакъа Iодихьад, бакъда, юртахой оарцах бовлар бахьан долаш наьха коашка хий чухьийданзар. Районерча администраце а, бехктокхамерча органаша а цу гIулакха жоп деннадац. Цул тIехьагIа «Кавказ» оала федеральни никъ тоабара балхаш дӏадоладаьд, из бахьан долаш никъ наьха цIенойл лакхагIа айбеннаб. ДогIаш дийлхачул тIехьагIа наьха ковнаш хотташа хьалдизад.
Сластенин Владимира белгалдир, дукха ха йоаццаш ше цига ваха хилар а, цу деша теркам беш шоаш хилар а. Министрий кабинета кулгалхочо яхачох, уж балхаш цу даькъ тIа кастта йистедаргда. Цу тайпара хий чухьедара кхерам болча моттигашка бахача наьха хьал аттача даккхара де мел деза балхаш йистедоахаргда. Тоадеча наькъашка тата соцаду экранаш а йогIаргья.
Назране яхача Эсиева Дебхана дехар а кхоачашдир. Арахьа дарба де яхара новкъостал де лаьрхIар цунна. Цул совгIа, СурхотIарча профилакторе эшаш дола дарба де таро а хургъя цун.
