Хӏара шера къахьийгад цо доккхагӀа а дикагӀа а балхаш де гӀерташ, я цун тахан иштта дика балха говзал а. МоллагӀа дола пхьоарал де эшар кхо хӀама да: ха, сатем, безам хилар.

Ший тамашийна кхоллама чам Ахьмада дӀабеннаб студента шта, цу юкъе я By Come Shop, «Лоаман оаз» яха студеш.

Со тешаш ва, кхоллам - из профессе лоархӀамегӀа йола оагӀув яц, из да вахара хьисап, гонахьара дуне кхыча беса де, безам совбоаккхаш хилара эшаш да из», - йоах зӀамсага.

Дукха къахьега деза пенаш тӀа йоазув деш, хӀана аьлча, зӀамига гӀалат даьлча беррига болх бовш моттиг я из, цудухьа ше болх дӀаболабеш хьалха цо дукхаза къахьег хӀара мугӀ нийса хургболаш.

Эггара дикагӀа дагабоагӀарех ба цо «Барски» яхача суши-баре баь болх, цига цо желтий гӀажилгашца роллаш гойтар доккхача суртаца. Цхьаькха а проект я цун тамашийна хоза, «Нарт» яхача латара клуба цо даь йоазон сурт.

«Гарри Потер, философе кхера» яхача книжка тӀара сурт дуллаш дӀахьош хинна болх, эггара чӀоагӀагӀа дагабоаллаш а безам тӀабодаш а хилар цун. Из болх духхьал дезалашта мара лаьрхӀа бац.

Дукха ха йоацаш, Ахьмада дагадехар гӀалгӀай меттала сакъердаме дувцар суртаца гойта. Цунна дагадехар гӀалгӀай мифологе дакъа лоацаш барех сюжет яккха. Иштта дӀаболабелар цун Колой Кӏанта хетабаь бегашта бола болх.

-Кхоллама балха тӀакхувш тха дезале берригаш а хиннаб, - йоах цо. Масала, са йиша гизгех гӀирсаш деш я. Бакъда хӀаранена ший тайпара гу из болх. Сога хаьттача, аз массайолча хана сай болх дикал йолаш, таханарча хано дӀабехаш хургболаш бу.

Рилсаш хьакхоллаш (уж тамашийна 60 секунд йӀаьха видеороликаш я) цо дӀалоархӀ заказчика дезар, цхьайолча хана клиента хьайна хетар дӀахайташ а хьалхадоаккхаш а хила веза, хӀана аьлча говзанчас уж мо моттигаш дикагӀа кхетаю.

Цхьа итт шу кхы даьлча, ший доалахьара студи йолаш ше хургва, аьнна, хет Ахьмада, из хургья таханарча заман дизайнерий проекташ дӀаяхьара йола центр.

Тхо раьза да, вай кагирхой шоашта бакъахьа хетар кхоачашде кийча хилара. Кхы а дукха керда проекташ, кхоллама болх дӀабахьа аьттув хилба цар.