ГIалгIайчен искусствон колледже - культуран болхлоех бола гойтам
ГIалгIайчен искусствон колледже дIабихьар тематически гойтам, из хетабаь бар гIалгIай культуран цIихезача болхлошта - поэташта, прозаикашта, журналисташта, суртанчашта.
«Гойтама керттера декхараш - кагирхошта йовзийтар гIалгIай цIихезача кхоллама болхлой цIераш, цар дош, искусство, иштта сомабаккхар цар гIалгIай меттацара безам, ноахала бувзам чIоагIбар, лорадар къаман тIехьален мах бараш, вай ноахалга уж кхачийтар», - аьлар «Сердало» газетага искусствон колледже.
Гойтам вIашагIболлаш къахьийгар Мейренаькъан Марета, цо дукха болх бир материалаш гулъеча, уж шоай моттиге хилийтара. Гойтаме го йиш яр гIалгIай культура массайолча оагIорахьара, шоай кхолламашка гIолла цун цIихеза викалаш: Боазаркъанаькъан Муртаза Идрис, Боканаькъан Хьаме Ахьмад, Заьзеканаькъан Хьусена Бахьаудина, Коазой Аюпа Iийса, Пхьиленаькъан Iасолта Мухьмад-СаIид, иштта кхы дукха деша, исбахьален искусствон говзанчаш.
Экспозицена чудоагIаш дар дукха литературни йоазош, архивера сурташ, вахара керттерча моттигашка даьха дола, исторически каьхаташ. Белггала йола моттиг дIалаьцар цу гойтаме гIалгIай метто, гIалгIай къаман овла хиларах тарра.
Гойташ хиннача материалашка гIолла колледжа студенташта дайзар гIалгIай метта кIоарга дешаш, цар маIан, Iадаташка гIолла метта хьал довзийташ йола моттигаш, къаман культуран мах бараш ларде лоацаш хилар из.
