Ессентуке дӀайихьача яхьашка, котало яьккхар вай къонача артисташа
Ессентуке дӀайихьача «Керда хьокхам» яхача яхье-фестивале котало яьккха цӀакхаьчар вай начӀал дола къона тӀехье. Из хоам «Сердалога» бир Илдарха-ГӀалий тӀарча мэре.
«Берригача мехкара 700 совгӀа артист гулвелар яхьашка цхьан доазон тӀа.
«Культуран оагӀонца гӀо деш бараш» яхача Ставрополерча юкъарча болама вӀашагӀъеллаяр из кхетаче. Илдарха-ГӀалий тӀарча культуран цӀено кхебаьраш белгалбаьлар «Эстрадера вокал» яхача оагӀонца. Гран-при Чуранаькъан Луизас яьккхар, 1-ча оагӀон лауреаташ ба аьнна белгалбир Ӏамарханаькъан Мухьаммад, Баьтаранаькъан Хьава, Ӏамарханаькъан Самира», - йоах тхога бенача хоамо.
«Коталонца даькъалабувц белгалбаьннараш, иштта царна хьийхараш! ДӀахойодача хана а иштта толамаш доахаш дӀачакхбала аьттув, низ хилба цар. Илдарха-ГӀала - начӀал дарий шахьар!» - аьлар шахьара да волча Дидиганаькъан Ахьмада.
