Кино доаккхача къахьийгараш бовзаргба вай мехкахошта
«ГӀалгӀай кинематографисташ российски, дунен кино доаккхача» яха кхетаче кийчъеш ба РФ кинематографистий, театра, кино Союза гӀалгӀай мехкара оагӀув. ГӀалгӀай паччахьалкхен 100 шу дизара хетабаь бола из боккха болх кийчбеш ба Россе культуран гӀулакхех йолча министерствос, гӀалгӀай мехкарча культуран гӀулакхех йолча министерствон болхлошца цхьана. Россе, дерригача дунен кинематографи дегӀайоалаеш лаьтта гӀалгӀай бовзийташ йола кхетаче хьалхара дӀахьош я вай мехка.
«Дунен кинон хьалха лаьттача духхьашхарча гӀалгӀай кинематографисташта хетаяь йоккха программа я дӀаяхьа лерхӀар. Иштта кино кхоллара болх бовзийташ йола кхетаче дӀахьоргья дешархошта, кагирхошта лаьрхӀа. Цига дакъа лоацаш хургба цӀихеза Российски кинематографисташ», - дийцар «Сердалога» культуран гӀулакхех йолча министерстве.
Кинематографе хьал айдеш лаьттача къаман къонгий цӀераш йовза еза вайна массанена. Массане дег чу южаш йоккха кхетаче хургья цох.
