«Урамашка гойташ долча кинон фестиваль — из лоаца кинош хьокхара беш бола дукха болх бар, цунна керттера маӀан дар уж оттадаь Россе автораш дукхагӀа дӀабовзийтар. Наха гойта оттадаьдар ворхӀ фильм, уж дар карарча хана дӀахьош хиннача фестивале хьалхара моттигаш яьхараш. Цу юкъе дар «Максима хинна халахетар», «БӀаргий хиш супа чу легар» , «Грига морх», «МоллагӀдар санна хьоалчагӀа», «Морхашка бода никъ», «Наташайна дагалаьттар», «Экстрасенс», — аьлар «Сердало» газетага ГӀалгӀайчен культуран министерстве. Наха харжарах, хьалхара моттигаш яьхар фестивале «Максима хинна халахетар» (режиссёр Дудник Виталий), «МоллагӀдар санна хьоалчагӀа» (режиссёр Ходюш Ирина), «Наташайна дагалаьттар» (режиссёр Гароника Дарья). Урамашка гойташ дола кино дукха нах хьежаш дола лоаца фильмаш да. Цар вӀашагӀтох дукха нах вӀашкаозаш дола доазонаш, майдаш, царех шоай аргӀагӀа кинозалаш хул, иштта ах миллион совгӀа саг ва, мехка тайп-тайпарча миӀингашка царга хьожаш.