Нах боабарах зуламхо дарба деча моттиге дӀахьожавир Ӏаьдало
38 шу даьннача вахархочун гӏулакх тохкаш хилар Наьсарера тохкамхой. РФ УК 105 ст. бехктокхаме озаш вар из саг (саг вер), бакъда набахта дӏахьожаве везаш хинна зуламхо къайла йолча стационаре дарба де хьожавир. «Тохкама оагӏон болхлоша белгалдечох, 2025-ча шера тов бетта 15-ча дийнахьа Наьсарерча Базорканаькъан цӏерах болча ураме лаьттача машина чу шийна вовзаш волча сага ирача хӏаманца кертах, фоартах, наькх тӏа, кулгаш тӏа човнаш яьй цо. Лозаваьр дарбанче кхелхав.
Цул совгӏа, 2025-ча шера тов бетта 18-ча дийнахьа Наьсарерча коа цхьаькха сага фоартах ира хӏама Ӏетташ човнаш яьй цо. Човнаш хиннача сага цу моттиге вахар хаьдад. Геттара боккха болх ба Тохкама оагӏон болхлоша дукхача нахага хоаттам беш, суда-лорий, молекулярно-генетически, криминалистически, иштта кхыйола экспертизаш дӏакхухьаш баьр. Гулдаьча дуккхадарашка гӏолла, зуламхо хьалаха аьттув баьлар Ӏаьдала», - дийцар «Сердалога» мехкарча Тохкама Комитете.
Суда-психиатрически комиссе из саг ше леладер кхетадеш, лертӏа вац, аьнна, оттадир. Дегӏаца психически лазар долаш хиннав из. Къайлача, цу оагӏонцарча моттиге дарба де дӏахьожавир зуламхо судо.
