Гӏалгӏайчен Кулгалхочо нах тӏаийцар, цар хаттарашка ладийгӏар
Гӏалгӏай Республикан кулгалхочо Келаматанаькъан Махьмуд-ӏаьлас «Цаӏ йолча Россе» парте кхетаченаш еча нах тӏаийцар, яхаш, дийцар «Сердало» газетага мехка кулгалхочун зарбан болх лелабераша.
Цун кхетаче хилар Йоаккхача Ачалкхен, Магаса, Наьсарен бахархошца, царна къувлача хаттарашка ладийгӏар, хӏарадар белгал а деш, царца дувзаденна лоархӏаме декхараш тӏадаьхкар.
Хьалхара хаттар дар Йоккхача Ачалкхен бахархой цӏерах Чопанаькъан Руслана. Цар дех къаьнара хин турбаш хувцар, Карл Маркса урамах никъ тоабар. Минэнергос яхачох, хин турбаш хувцаргья 2026 шу чакхдалале, цул тӏехьагӏа Магӏалбика кхален наькъа ганза таронах наькъаш а тоадергда.
СВО ветерана Хьулахой Рустама дийцар республикан Кулгалхочунга Наьсар-Кертерча Вокзальни урамах нийслуча кхоачамбоацарех. Догӏаш дийлхача из никъ бохабу, цу тайпара цӏен а кхерам болаш да из. Мехкадас тӏадиллар Наьсарен администрацена, карарча шера маьтсела бутт дӏабалале из дехар кхоачашдар, цига никъ ӏобиллар. Цул совгӏа, юрта спортивни занятеш дӏаяхьара майда а я эшаш.
Ашарий ишкола хьехархоша Шодажанаькъан Зарас, Галай Беллас хьалхадаьккхар Магасе искусствай берий ишкол хьалъяр. ГӏР культуран Министерствос кийчдеш да федеральни субсиди эцара каьхаташ. Из хьалъе йоалаергья 2027 шера. Из кхувш йоагӏача тӏехьен кхоллам дегӏакхувлара дика майда хургья.
Макшарипа Махьмуд-ӏаьлас терко тӏайохийташ ладийгӏар Буро кӏалхарча Оздой ӏалаудинага. Хьалхагӏа цо ший хаттар деннадар, «Нахацара къамаьл» яхача телепередача дӏахьоча хана. Хӏанз цо къаьстта тӏахьийхар из хаттар къоастадара. Цун дехар дар, Афганистана Герат оалача моттига юхе тӏом латташ турпалал гойтача 101-ча мотострелкови бӏун командира Оздой Хаматхана ӏумара турпалхочун цӏи а, иштта доагӏаш дола тӏема совгӏат а далар. Из чу а лоацаш, республикан Тӏема комиссариата доагӏаш дола каьхаташ кийчду РФ герзашцарча низий Министерстве дӏадахьийта.
Иштта ГӏР Кулгалхочо аьлар, республикан Наьсаре е Наьсарен кхале бӏухой- афганций сийлен Аллея хьакхоллара эшар кийчде, аьнна.
