ГӀаьбартой-Балкхарой мехкара хьаьший вайцига бахкар чакхдаьлар
Балха ди йистедоалаш, Келаматанаькъан Махьмуд-Ӏаьлас, ГӀаьбартой-Балкхарой кулгалхочо Коков Казбека шин оагӀорахьара кхетаче дӀайихьар, яхаш, хоам бу ГӏалгӀай Республикан Кулгалхочун, Паччахьалкхен зарбан-болх лелабераша.
Келаматанаькъан Махьмуд-Ӏаьлас баркал аьлар Коков Казбека, из вайцига варах а иштта шин оагӀорахьа бувзам лелабара тӀехьа хиларах а.
«Сона хетачох,тайп-тайпарча доакъош тӀа шоайла балха говзал дӀа-юха эцаш, Ӏаьдала викалаша болх цхьана дӀахьош хиларах пайда боал республикай бахархошта. Вай лаьрхӀа да бахархой вахара хьалаш тоаде», - аьлар Келаматанаькъан Махьмуд-Ӏаьлас.
Цо иштта тӀатехар, ГӏалгӀайчен къахьегама моттигаша никъ хьабелларгба кхыча республикашта, шоайла пайда дӀа-юха эцара.
Ший аргӀагӀа, Коков Казбека белгалдир, дукхача хана денз ши къам шоайла айхха бувзам болаш хьадоагӀаш хилар, цо иштта аьлар, дӀахойодача хана а тайп-тайпарча балха доакъош тӀа къахьегаш хилар нийса долга, цу гӀулакха паччахьалкхен комисси а балха тоабаш а вӀашагӀъехкача дика хургдар, керда бувзамаш леладара.
