Кадастрацара болх тоабеш ба мехка
Доазонаш белгалдара болх дӏахьош хилар вай мехка. Укх тӏехьарча кхаь шера 40 муниципальни моттиге административни доазош къоастадеш къахьийгар цу оагӏонцарча болхлоша. Цу балха юкъеяхар шахьара моттигаш, муниципальни кхалеш, юрташ. Хӏара моттигаца дувзаденнараш цу оагӏонцарча Цаӏ йолча паччахьалкхен реестре чӏоагӏдеш болх ба тахан мехка дӏахьош латтар.
«2024-ча шера мехкарча 22 моттигах дола каьхаташ дар кийчдаьраш. Магас-Шахьара доазош 19 моттигаца белгалдир, 9 куран, иштта 539 гӏишлон кадастрови балхаш кхоачашдир. Иштта болх дӏахьош хилар Шолжа-Шахьаре, Илдарха-Гӏалий тӏа, мехка йиъ кхалене»,- дийцар «Сердалога» мехкарча паччахьалкхено.
Гӏай дола моттиг белгалъяр, доазош боаггӏача боараме къоастадар чӏоагӏа лоархӏаме да тахан мехка. Юридически, иштта кхыдолча оагӏонашца ӏаьдало дӏадеххача тайпара нийсдаь хила деза цу оагӏонцара хӏама. Бахархошта, бизнесменашта паргӏато еш гӏулакх да из, хӏана аьлча шоай доалахьара лаьтташ лорадар 100%-га кхоачаш чӏоагӏа хул цар, цунга хьежжа доазошта тӏагӏолла хулача довнех, лоалахошца судага гӏолла леладе дезача къовсамех, кӏалхарабоал уж. Цул совгӏа, цхьаккха гӏалатло йоацаш, керда наькъаш дохкаш, ишколаш, дарбанчеш, иштта кхыйола лоархӏаме гӏишлош хьалъеш, бола болх дӏабахьа йиш я хьакимий.
Юридически оагӏонца лаьтта «цӏена» хиларо, цу оагӏонцара хӏама чӏоагӏдеш бола болх боаггӏача боараме дӏабихьа хиларо дукхача хьаштдоацарех кӏалхарвоаккх, мехкарча экономикан хӏама тоадергдола инвестораш тӏаозарца а чӏоагӏа лоархӏаме да из. Республикерча шахьарашкара, юрташкара лаьтташ кхаьч-кхаьчачо шийна ма тов дӏалувцаргдоацаш, лаьттан доазошцара хӏама кегалургдоацаш, дӏахьош болх ба из ЕГРН.
