ГӏалгӀай мехка «Нана-турпал» яха орден елар
ГӏалгӀайчен Боголанаькъан дезала лоархӀаме ди да, РФ Президента СКФО викал ваьча Чайка Юре, паччахьалкхен Кулгалхочо тӀадиллача декхарах, дукха дезал болча нанна Хамхой Марема «Нана-турпал» яха орден еннар.
Из белгало, нана хиларах тарра цун къахьегама лакха мах оттабеш я, цун да 11 бер, зӀамагӀчун массехк бутт мара баьннабац. Цул совгӀа, орденца цхьана Марема делар Наьсарерча йиъ фусамах латташ йолча квартиран дӀоагӀаш.
ГӏалгӀайчен Кулгалхочо Келаматанаькъан Махьмуд-Ӏаьлас белгалдир, Боголанаькъан дезало масал гойташ хилар, къахьегама тӀера болаш, цӀенъюкъе даь-наьна безам болаш уж хилара.
«Наьсарен-Шахьара доал дара даькъ тӀарча Дошлакъий-Юрта бахаш бола дезал къахьегама тӀера болаш, даь-наьна юхь йолаш, дика масал гойташ хьалкхебеш ба», - аьлар республикан кулгалхочо.
Цо кхы а тӀатехар, 11 дезалхо хьалкхевар - из даькъала хиларал совгӀа, боккха къахьегам а ба. Ший вахара бувзамашка, Мехкадас терко тӀаяхийтар, дукха дезал бола фусамаш Ӏаьдало керттерча моттиге лоаттаеш хилара.
