Къаман проекташ йоаржаяра болх, лакхача боараме дӏахьош ба мехка
Президентски къаман проекташ йоаржаяра болх дикача боараме дӏахьош ба ала йиш йолаш да вай тахан. Хьахьожадаьчох 86%-га кхоачаш дола рузкъа балха дӏадахийтад, 99,3%-га кхоачаш бартчӏоагӏам вӏашагӏбеллаб. Цул совгӏа, российски юкъерча боарамга диллача, ялх проектацара болх йиллача ханал хьалха чакхбоаккхаш ба. Къаман проекташка гӏолла хьалъеш латт мехка керда ишколаш, берий бешамаш, наькъаш, коммунальни моттигаш тоаеш, унахцӏенон оагӏонца дувзаденнараш меттадоаладеш къахьегаш ба.
Вай мехкадас Келаматанаькъан Махьмуд-Ӏаьлас белгалдир, къаман проекташка гӏолла шахьарий, юртий хьал дикка меттадоаладеш латтилга. Республикан кулгалхочо теркалдечох, доккхий хувцамаш хиннад ала йиш ярех да вай тахан: Чамалха, Ӏаьлий-Юрта керда фельдшерско-акушерски моттигаш хьайийллай; Сурхо тӏа хьадийллад вахара оагӏонца гӏо деш дола Цӏа, иштта дарбанчеш, ишколаш тоаяьй боккха болх дӏахьош.
Доккхий хувцамаш хиннад ала деза наькъаш тоадарца, берий бешамаш, иштта Ӏарпенаькъан Ювсапа цӏерах йола колледж тоаярца. Пхи никъ боккха болх чакхбоаккхаш тоабаьб, иштта керда автобусаш йоалаяьй мехка. Цул совгӏа, Илдарха-Гӏалий тӏа керда хин турбаш чуяхкар, харцар кхерам болча цӏеношкара бахархой кхычахьа дӏачубохийташ болх ба дӏаболабаь. Республикерча дукхача моттигашка доккхий хувцамаш да тахан дӏахьош латташ.
Масала, Кердача Реданте, Пхьилекъонгий-Юрта, Гӏажарий-Юрта, Галашка керда ишколаш хьалъеш латт, 24 юкъара моттиг тоаеш къахьийгад, иштта коммунальни оагӏонца а башха хувцамаш да. Унахцӏенон, культуран гӏулакх меттадоаладеш, бахархошта вахара оагӏонцара гӏо де хьожаш болх ба дӏахьош латташ.
Вай Мехкадас хьакимашта тӏадиллад массайолча оагӏонцара болх боаггӏача боараме, тӏехьагӏа цхьаккха тайпара кхоачамбоацараш гучадаьнна хӏама хургдоацаш лакха терко, тӏахьожам лоаттабеш дӏачакхбаккха, аьнна. Мехка гӏулакхаш тоадара тӏехьа хьахьожадаь дола рузкъа доаггӏача дӏадохийташ хила деза, эшам болаш, е гӏалатбаьнна хӏама хургдоацаш, деррига лорадеш хила беза. Ер шу чакхдалале, лаьрхӏа мел дола гӏулакхаш юххьанца къоастаяьча хана, боаггӏача боараме чакхдаьха хилийта, аьнна, тӏадиллар вай Мехкадас хьалхалаттарашта.
