Тоаяьча гӀалашка хьежар Гуцаранаькъан Микаил
06.09.2023 11:15
Морчи Хьарпи яха гӀалаш тоаеш болча балха хьалхара дакъа йистедаьлар. Гуцаранаькъан Микаила «Сафмар» яхача гӀо лоаттадеча ганзо новкъостал деш, дӀахьош ба из боккха болх. Тоаяьча моттигашка хьажа ваха хилар бизнесмен. Бишта тӀехьа тоаяь Ӏооттаергья Морч. 12-ча, 16-ча бӀаьшаре хьалъяь гӀалаш я уж вай даьша. Хано тишъяь гӀалаш херцаш латтар. Тоае езача хьале уж кхаьча дукха ха яр. Кхаь гӀалан куц хийцад: цаӀ - тӀема гӀала, шиъ — нах бахаш хинна.
Кхы а массехк гӀала я цига тоае лерхӀаш, цу гӀулакха эша каьхаташ кийча хилча. Нах баьха йиъ гӀала бӀаргаго хӀама доацаш, хаьрца яр. Цхьа шу хиллал йолча хана къахьийгар болхлоша уж меттаоттаеш. Массехк гӀат дола гӀалаш хилар царех хӀанз, гӀалай цӀи тӀалаттача тайпаша новкъостал а деш.
Хьарпе баьхаб Матенаькъан, Ӏамарханаькъан. Дукха гӀалаш латташ моттиг хиннай из ший хана. Цун доазон тӀа 4 маьлха кашамаш да, 13 метр лакха йола тӀема гӀала, нах бахаш хинна 8 гӀала я.
Гуцаранаькъан Микаила тӀадиллар, кхыйола гӀалаш тоаеш дӀабахьа безача балха каьхаташ кийчде, аьнна. КашетӀе яха юрт, Дударанаькъан гӀала тоае лерхӀ, дукха ца говш. Лоаме мел латта гӀалаш меттаоттаеш бола болх дӀабахьа лаьрхӀад, 20 шера къахьегаш.
