Маьт-Лоам: гӀалгӀай къаман культуран тӀехьале, сийле
Къилбаседа Хӏирийчен гӀишлшъяра, архитектуран Министерствос федеральни паччахьалкхен хоамий система доазон план оттаяьй (ФГИС ТП) «Къилбаседа Хӏирий-Алания Республикан доазон план хувцара йола моттигаш юкъейоахаш», из могадеш дола каьхаташ а да цунца. Федеральни министерствай, боахамий хӀанззе а кхийнад духьале йоацаш из хьаллаца. Бакъда оаха теркалдаьд, из ГӏалгӀайчен Жӏайрахьа доал дара кхален доазон схемаца хотталуш хилар. ДукхагӀча даькъе, из доагӀаш да «Кавдоломит» моттига, Горбани яхача юрта, Столовая гора оалача моттига (Маьтлоама).
Белгалду цунца дувзаденна, «Кавдоломит» карарча хана ГӏалгӀайчено хургйолча «ЖӀайрахь» яхача парка керттера дакъа лоархӀаш хилар. Цох яздаьдар «Сердало» газета укх деношка, Россе экономически дегӀаяра министра гӀонча Назаров Сергей ший балха гӀулакха мехка венача хана, цунна из йоккха проект а гойтар.
Цхьаккха а бахьан хила йиш яц, гӀалгӀай беза Маьтлоам (Столовая гора) шоашкахьа оза гӀерташ уж хилара, цунца ювзаенна гӀалгӀай культуран-исторически тӀехьале а деррига вахар а да, из хьагойт Кавказа дукхача тохкамхоша даьча авторски балхаша.
Из тема ювцаш тха редакце болхлой бахар ГӏалгӀай, Ӏоахарганаькъан Ч.Э. цӀерагӀча Ӏилма-тохкама, гуманитарни Ӏилмай института кулгалхо, цӀихеза Ӏилманхо Харсенаькъан Борис волча, цох шийна хетар цо аргдолаш.
