Ветераний цӀа тоадеш, болх дӀаболабергба республике
Ветераний ЦӀен 1-гӀа корпус тоаеш, болх дӀаболабе лерхӀ республике бӀаьстан шоллагӀча бетта. 33 шу хьалха хьалъяьй из гӀишло. Цига Ӏеш болча боккхача наьха хьал аттачахьа дерзаде дӀахьош болх ба из.
260 млн рузкъа да федеральни оагӀоно цу гӀулакха хьахьожадаьр. Чура пенаш, кораш, наӀараш, тховнаш хувцаш, боккха болх ба дӀабахьа лерхӀар. БоаггӀача боараме куц долаш хургда ветераний цӀа, болх йистебаьлча. ПаргӀатта салаӀа, дегӀа могашал меттаоттае йиш хургья укхаза тӀема доакъашхошта гӀо деш хиннарий, боккхача тӀема бӀухой истий, тӀема операце ветераний. Вай мехкадас Келаматанаькъан Махьмуд-Ӏаьлас белгалдаьча тайпара, федеральни оагӀоно новкъостал лоаттадарах вахара оагӀон моттигий хьал тоадеш, боаггӀача боараме цига салаӀа, дегӀа могашал меттаоттае йиш хургйолаш къахьегаш ба мехка тахан. «Теркалде лов сона, ветераний цӀа бӀарга тоам беча, хозача моттиге Сурхо тӀа уллилга. Къаьстта ха яхача наха геттара паргӀата хет из моттиг, республикера бахархой раьза болаш хул цига ха яккха», - белгалдир вай Мехкадас.
