ГӏалгӀай мехка кхетаче хилар, Чайка Юре кулгал деш
ГӏалгӀай мехка кхетаче дӀайихьар, РФ Президента СКФО гӀолла викал ваьча Чайка Юре кулгал деш. Гулбеннараша дийцар республика дегӀайоалаяра даькъ тӀара хаттараш.
Чайка Юре белгалдир, лоархӀамеча даькъ тӀара - вахарца дувзаденна хьал даим тӀахьожам болаш да ГӏалгӀайчен Кулгалхочун, Паччахьалкхен оагӀорахьара. Къаман проекташ кхоачашъяра даькъ тӀа даьхача толамаша из иштта долга хьагойт: дӀадахача шера республико хьагойтар «Дешар» яха проект кассага гӀолла 99,8 процента кхоачашъяь хилар.
Иштта дале а, мехка хьехархой кхоачам болаш бац- 40 моттиг совгӀа яьсса юсаш я, къаьстта физика, информатика, математика, географе, химе Ӏилмаех. Паччахьа викала белгалдир, Къилбаседа Кавказа кхыча моттигашкарчул из кхоачамбоацар лохагӀа долга, цо хьалхадаьккхар хьехархошта алапи лакхдар, тӏаккха из хаттар дикагӀа кхоачашде тарлу, аьнна.
Цул совгӀа, кхетаче дийцар кхыдола хаттараш, къаьстта ГИА, ЕГЭ дӀалуш нийсденна кхоачамбоацараш. Чайка Юре Къилбаседа Кавказа моттигаш тӀахьийхар цу тайпара кхоачамбоацараш юкъера дӀадахара, аттестаци дӀаяхьара дика хьалаш хьакхоллара.
«Кхоана уж бераш гӀоргда професси караерзае - юкъерча лаьрххӀача е лакхарча дешара моттигашка, хӀара мехкара таронаш вӀашагӀйохкача, кхыметтел берригача мехкара хьал тоадеча дӀаовттаргба уж. Цар шоай хьашташ кхоачашдар тийша да, экзаменаш дӀаялара дола хьалаш лерттӀа хиларах», - аьлар Чайкас.
Ший аргӀагӀа, ГӏалгӀайчен кулгалхочо Келаматанаькъан Махьмуд-Ӏаьлас тешам белар, Чайка Юре тӀадаьхка декхараш дика тохкаргхиларах, уж балха юкъедоахаргхиларах.
