Гӏишлош дӏаязъяра тӏакхийтар 13 562 керда моттиг
Мехкарча Росреестра болхлоша боккха болх дӏабихьар; мехкарча эзараш цӏеношцара, моттигашцара хӏама къоастадеш. Из хоам «Сердалога» бера мехкадаь зарбан болх лелаберашкара.
«Боаггӏача боараме кадастрови болх дӏабахьар чӏоагӏа лоархӏаме да бахархой вахаре. Лаьттан доазошцара, цӏеношцара хӏама хила деззача тайпара къоастадаь, дӏаяздаь латташ хилча, шоай доалахьарча хӏаманца моллагӏа болх чакхбаккха, хий, газ дӏатӏадахьа хала хилац бахархошта», - белгалдир вай мехкадас Келаматанаькъан Махьмуд-ӏаьлас.
Боккха болх чакхбоаккхаш къахьийга, паччахьалкхен Цаӏ долча йоазон юкъейихьар 13 562 моттиг: 9 491 лаьттан доазош, 4 071 гӏишлош. Балха юкъе 16 кадастрови я кур ба, нах бахаш йола пхи моттиг йолаш. Цул совгӏа, моттигерча рузкъах кхы а шин курах болх чакхбаьккхаб – 32 моттигах дола гӏулакх къоастадаьд.
Тӏахьожам беш дӏахьош бола лоархӏаме болх ба из тахан. 979,9 эзар сомах яь хинна чӏоагӏо йохаяьй болх бергба аьнна тӏаийцараша шоай декхараш боаггӏача боараме кхоачашцадарах. «ЕГРН оагӏонцара болх лаьттан доазошца, гӏишлошца дувзаденнараш хила деззача тайпара къоастадеш дӏахьоргба.
Федеральни программага гӏолла Президента тӏадехкараш кхоачашдеш мехка чакхбаккха безаш лоархӏаме, боккха болх ба из тахан», - белгалдир вай Мехкадас. Келаматанаькъан Махьмуд-ӏаьлас баркал аьлар мехкарча Росреестра оагӏонна кулгал деча Борисов Андрея, ерригача тоабанна, шоай декхараш боаггӏача боараме кхоачашдарах.
