2800 совгӀа гӀала меттаоттаергья ГӀалгӀай мехка
26.05.2025 20:53
2,8 эзар совгӀа гӀала чуйодаш йола 500 моттиг меттаоттаеш къахьега лаьрхӀа ба вай мехка. Кавказерча инвестицеех йолча кхетаче дийцар цох лаьца бизнесмен волча Гуцаранаькъан Микаила. Мехка культуран оагӀонца дувзаденнараш лорадара тӀехьа дӀахьош боккха болх ба из.
«Из проект йоаржаяра тӀехьа ЖӀайрахьа кхале тӀоговзанчаш Ӏомабеш лаьрххӀа ишкол хьайийллай. Карарча хана проекте дакъа лоацаш пхи компани я, из болх кхы а дӀашербе лерхӀ оаха», - аьлар Гуцаранаькъан Микаила.
Белгалде деза, проекта юкъе гӀалаш меттаоттаярал совгӀа, дӀадахача бӀаьшерашка хинна хӀамаш лохаш, хьаохкаш бола болх дӀабахьар долга. Дукха хӀамаш я тахан кораяьраш. Царна юкъе да Ирана аьшка ахча, иштта кхыйола, вай къаман истори довзийташ йола хӀамаш.
