Из таханарча заман хоза гӀишло хьалъяьй хьалхагӀа къаьнара берий беш хиннача даькъ тӀа, «Дешар дегӀадоаладар» яхача паччахьалкхен программах.

Керда берий беш хиларо гӀадбугаргба берий дай-ноаной а иштта бераш шоаш а: укхаза хоза мебель оттаяьй, ловза дукха моттиг я. Дешара кабинеташ я; логопеда, психолога балха лаьрхӀа фусамаш; иштта я ашарий, физкультуран ченаш; ловзара лаьрхӀа йола майдаш - цу дерригне а таро лу бераш дика дегӀадоаладе.

Укхаза керттера терко тӀаяхийтай могашал йоацача берашта хьалаш хьакхоллара - лифт я, дӀа-юха лелара дика таронаш я.

«Со тешаш ва, вай тахан Наьсаре хьайийлла керда берий беш царна шоллагӀа дола цӀа хургда, цо таро лургья дика уж дегӀабоалабе. ТӀаккха даьшта а из дика накъадоалаш да, шоай бераш тешамеча кулга кӀалха хилар царна лоархӀаме а да», - аьлар ГӀалгӀайчен кулгалхочо Келаматанаькъан Махьмуд-Ӏаьлас, ше из хьаеллаш, лаьрххӀа къамаьл деча хана.