Къаман проекташ йоаржаяра болх толамца дӏахьош ба вай мехка
Къаман проекташ йоаржаяра болх дикка дӏахьош ба ала йиш я тахан вай мехка. Керттерча проекташка гӏолла къахьегар, цу гӏулакха рузкъа хьахьожадар, Россе Минфино белгалдечох, мехкарча юкъарча боарамал лакхагӏа латт вай республике. Укх шера вайна хьахьожадаь ахча 5,8 млрд сомага кхоачаш да , федеральни субсидеш – 5 млрд совгӏа. Моттигерча хьакимаша 5, 38 млрд ахчах 92, 7% рузкъа дӏалоацаш йола моттигаш къоастаяьй, хӏаьта ахкан шоллагӏа бутт чакхбоалача хана 2,79 млрд (46,8%) болх дӏабихьа баьннабар.
«Къаман проекташка дакъа лацаро вай республикан боккха пайда бу, лоархӏаме дола декхараш кхоачашде аьттув боал. Бахархой хьал цу оагӏонцарча балхага гӏолла аттачахьа даккхар да тахан лоархӏаме. Юххьанца белгалдаь хинна декхараш боаггӏача боараме кхоачашде аьттув боал ала йиш йолаш да тахан. Къаман проекташкара болх массахана терко е езаш, тӏахьожам эшаш ба. Россе Президента цу оагӏонца белгалдаь декхараш лертӏа кхоачашде аьттув баргба, вай деррига тӏехдика дӏадахьа гӏерташ къахьегаш хуле», - дийцар мехкадаь Келаматанаькъан Махьмуд-ӏаьлий зарбан болх лелабераша. «Дӏаьха, кадай вахар» яхача программага гӏолла республике болх дӏабахьар тахан 70,3% - га кхоачаш да, мехкарча юкъерча боарамга диллача – 45,6%.
«Экологически оагӏонцара паргӏато» яхача программага гӏолла къахьегаш тахан 61,8% -тӏа латт вай мохк, Россерча 30% духьала. «Вахарера гӏулакхаш» яхача проектага гӏолла дӏахьоча балхах тахан 55, 2% тӏа латт вай, 40% духьала, хӏаьта «Дезал» яхача оагӏонцара болх 56,5% тӏа латт, Россе юкъерча 54,4% боарамга диллача.
Ма дарра дийцача, тахан республике 12 къаман проекташка гӏолла болх дӏахьош ба. Царна юкъе да унахцӏенонца, дешарца, ЖКХ, наькъашца, таьрахьашца, экономикаца, иштта вахарерча, кагирхой политикаца дувзаденнараш. Цу программашка гӏолла укх шера вай мехкарча юрташка хьалъеш латт йиъ ишкол, иштта Сурхо тӏа тоадеш латт ха яхача наха терко еш, царга хьожаш дола Цӏа. Цул совгӏа дешара, культуран, бахархошта салаӏа, ха дӏахьош багӏа 24 моттиг тоаеш боахк мехка.
