«Каст-каста тӏабоагӏа тхона санаторе баха, дегӏа могашал меттаоттае новкъостал дар дехаш, иштта ӏаьдалгара хьадоагӏаш долча хӏаман тӏехьа гӏо де шоашта яхаш бола нах. Чӏоагӏа ӏоткъам беш да вай мехка бӏаргашта хӏама ца гуча зӏамигачарна лаьрхӏа берий беш цахилар. Цу берий даьй, ноаной ух тхо долча, из гӏулакх дахьаш. Вахара оагӏонца шоашта лоаттаде дезаш дола хӏама хьаэца новкъостал де шоашта яхараш хул, хьакимашта тӏаухаш, тхоашта могар деш цар хьашташ кхоачашде, гӏулакхаш аттачахьа даха хьож тхо», - дийцар тха газета интервью луш Ерригача Россе бӏаргса эшаденнарий моттигерча оагӏонна кулгал деча Саганаькъан Адама.

Дувцилга а доацаш, дукха низ, къахьегам эшаш да бӏаргса эшаденнараш цхьан хӏаманца салоӏам хулаш, цхьа гӏулакх леладеш хургболаш болх лоаттабар. ИРО ВОСо тахан йоаржаеш йола программаш духхьал из гӏулакх хьаллоацаш я. Кхыбараш санна миччахьа дӏаваха, ший дега ма тов къахьега, цхьа хӏама хьакхолла аьттув боацача сага чӏоагӏа лоархӏаме да шийна дӏадохьалургдолча гӏулакхе чӏоагӏвалар, цхьаннахьа цхьа дакъа лоацаш хилар.

Тахан ИРО ВОСа бӏаргашта хӏама гуш боацарашта гӏо лоаттаду цаӏ мара йоаца моттиг я мехка. Ма дарра аьлча, дийца ца валлал боккха, лоархӏаме болх ба цу оагӏон доакъашхоша дӏахьор. Дегӏа могашал эшаеннача нахага физкультураца бувзам болаш хилар дех тахан лораша, хӏана аьлча психологически, физически хьал меттаоттаде эшаш я физкультура. Цул совгӏа, укх тӏехьарча шерашка дикка къахьийгад бӏаргашта хӏама гуш боацарашта юкъе спорт йоаржаярах йола проекташ, программаш хьакхоллаш. Теннисах, гандболах, волейболах, жӏакех ловза аьттув луш йола секцеш я тахан цу наха лаьрхӏа.

«Моттигера, иштта къамашта юкъера, ерригача Россе яхьаш дӏакхухь тахан ше-ший аргӏагӏа. Россе тайп-тайпарча моттигашкара спортаца бувзаме хила ловш бола эзараш нах хул цу юкъе дакъа лоацаш. ИРО ВОСа тоабо курсаш, семинараш йоаржаю цу нахаца болх беш болча тренерашта лаьрхӏа. Цу дешара курсех чакхбаьннаб берригача мехкарча 70 совгӏа заӏапхочунца болх беш бола тренераш», - аьлар Саганаькъан Адама.