«Тӏехьале» яха меттаоттадара ишкол цхьан юкъа хьаьший тӏаэцаш яц
Гӏалгӏайчен Жӏайрахьа кхале догӏаш дийлха, Лохерча Пхьуй гӏалашта тӏадода тӏий дохадаьд. Карарча хана цу майдан тӏа я «Тӏехьале» яха гӏишлонхой-меттаоттадара ишкол, цига шоай балхаш чакхдоахаш ба уж. Цига тӏабода никъ бохар бахьан долаш, туристаш хӏанзарчоа цига баха йиш йоацаш бисар.
«Тахан тха таро яц хьаьший тӏаэца ишколе, тхоай музейшка, иштта оаха юхаяьхай хьалха дӏаяхьа лаьрхӏа хинна кхетаченаш. Дехараш дукха да - Пхьуйра гӏалаш дукхача туристашта езаеннай. Тхо тешаш да; цига хиннарашта уж моттигаш дагалатташ хургья, аьнна. Дӏахо кхы а дукха вӏашагӏкхетараш хургда. Уж таронаш хиларах оаха хоам бергба», - аьлар «Сердало» газетага «Тӏехьале» яхача гӏишлонхой- меттаоттадара ишкола кулгалхочо Султиганаькъан Рамзана.
Гӏалгӏайчен «Тӏехьале» яха ишкол - из цу тайпара цаӏ мара Россе йоаца дешара проект я, из лаьрхӏа я къаьнара Кавказа искусствон говзал меттаоттаяра. Ишкола кулгалхо Султиганаькъан Рамзан ва 25 шера кхеранца къахьегача балха говзал йола гӏишлонхо. Цо меттаоттаяьй Испанера, Португалера, Францера, Ингалсий мехкара гӏалаш, исторически моттигаш.
