Турпалал гойташ вахар хаьдача тӏемахочунна сийленг оттадир вай мехка
Афгански тӏема юкъе вахар хаьдача Оздой Ӏумара сийленг оттадир Буро кӏалхарча №1 йолча ишколан коа. 1978-ча шера СССР эскаре амал де вахар Ӏумар, хӏаьта 1980-ча шера 101-ча мотострелкови полка разведрота го баь латтарашта юкъера хьаарайоаккхаш, геттара чӏоагӏа хиннача човнех ахкан шоллагӏча беттацарча 25-ча дийнахьа, 1980-ча шера вахар хаьдар турпала.
«Афганистанерча тӏема юкъе хиннача вай къаман къонгий истори дийндеш, боккха болх дӏахьош ба тахан мехка. 320 гӏалгӏа ва цу тӏем чакхваьннараш. Цхьа моттиг нийсъеннаяц вай къаман къонгаш цигара байдда, мелал гойта. Паччахьалкхен совгӏаташца белгалбаьб 66 бӏухо, хӏаьта республикан Президент хиннача Овшанаькъан Русланах Советски Союза Турпал вир», - дийцар «Сердалога» Халкъа Гуллама депутат волча Олиганаькъан Бадрудина.
Хана йӏоахалца дицлургдоаца, дицдала йиш йоаца хӏамаш да уж! Афганистана турпала гӏо деш йола тоабаш лораеш, наькъаш тоадеш, маьрша адам лорадеш къахьийгад. Гӏалгӏай къаман къонгаша дӏахьекхад сий, яхь, денал яхача дешай маӏан шоай дегашта доккха долга.
Цига хиннача турпалий цӏераш йицъеш бац мехка. Цар сийлен урамаш хьаделлаш, ишколашка денала урокаш еш, кагирхошта из деррига истори довзийташ, боккха болх ба дӏахьор.
