«Мехкаш довзаш леларал доккхагӏа» яха туристий кхетаче дӏахьоргья мехка
«Мехкаш довзаш леларал доккхагӏа» яха туристий кхетаче дӏаяхьа кийчо еш ба тахан мехка. Къилбаседа Кавказа моттигашкара 150 саг кагирхой ба вайцига гуллургбараш. Укх бетта 20-ча денгара 23-ча денга кхаччалца, лоамашта юкъе уллача юрта - Бейне дӏахьоргья из. Кхетачен программо чулаьцараш дукха да, беррига болх чакхбоалача хана Маьтлоам тӏа бала безаш ба доакъашхой. Республике гуллургба Нохчашкахьара, Селий мехкара, Гӏаьбартой-Балкхарой мехкара, Ставрополера, Къарший-Черсий мехкара, Хӏирашкахьара викалаш. Хӏаьта уж берригаш тӏаэцаш болча вай мехкара 20 саг хургва цу юкъе.
«Сердалога» бенача хоамах, доакъашхошта кийчъяь дешара программа хургья цига. Никъ кхераме хургбоацаш теркалде дезараш довзийтаргда къонабарашта, иштта ара хӏама даар, кхача кийчбар, лозабаьрашта гӏо дар, никъ хьалахар мишта хила деза хьехаргда царна. Гобоаккхаш леларах лаьца, ара моллагӏа дагадоаца хӏама нийсделча фу де деза хьехаш лекцеш ешаргья. Лоархӏамеча хьаьшаца – мехкашка гӏолла леларца РФ цӏихеза волча, Россе спортацарча туризма чемпион, спорта говзанча хиларах массанена вовзаш волча Мержой Константинаца кхетаче хургья къонабарий.
Шин даькъа йийкъа я программа, доакъашхой кийчонга хьежжа. Хьалхара тоаба эколого-туристически наькъ тӏагӏолла 1300 метр лакха бола Лаьжгера кхуркхолг болча гӏоргья; хӏаьта из гӏулакх дикагӏа довзаш, кийчо яь бараш 3000 метр лакха болча Маьтлоам тӏа баргба.
Дешара, спорта оагӏонаш чулацарал совгӏа, культуран оагӏонца а лоархӏаме болх ба ала деза цох тахан. Сайрийна, цӏера гонахьа ӏохайша, вӏаший бовза, доттагӏал тасса аьттув хургба къонабарий. СКФО моттигашкара гулбеннарашта вай къаман ӏадаташ, дӏаьхий дола истори, культура, хоза, беркате лоаме йовзаргья.
