Татрий мехка кулгалхо: ГӀалгӀай мехкарча моттигаша чӀоагӀа цецваьккхав со
ГӀалгӀай мехка шийна дайначох чӀоагӀа тамаш еш, дега тоам хинна ва Татарстана кулгалхо. Къаьстта чӀоагӀа цецваьннав воккха хьаким лоаман моттигех.
«Культуран оагӀув теркалбича, чӀоагӀа тамашийна хозаленаш я ГӀалгӀайче. Сона вӀалла дага хиннадац укхаза иззал гӀалаш ма латтий аьнна. Хоза, беркате Ӏалам, хьаьшашцара лерхӀам, тайп-тайпара бола мерза кхача - из деррига дог ураоттадеш да.
Укх дунен тӀа цхьанна моттиге яйнаяц сона ГӀалгӀай мехкаръяраш санна гӀалаш», - белгалдир цо. Мехкадаьца Келаматанаькъан Махьмуд-Ӏаьлаца республикерча лоархӀамеча моттигашка гӀолла го боаккхаш хилар Минниханов Рустам.
ТӀаргиме, Аьга-Кхале баха хилар уж, тӀема гӀалаш, нах бахаш хиннараш, иштта кхыйола, дӀадахача бӀаьшере хьалъяь гӀишлош гойтар Татрий мехкара венача воккхача хьаьшага. ГӀалгӀай къаман истореца ювзаенна кхыйола моттигаш, малхара кашамаш, петроглифаш гойтар цунна.
Туризм йоаржаеш цхьана болх дӀабахьарах дийцар вай Мехкадаси Минниханов Рустамеи, иштта къаман исторен оагӀонцара сийленгаш лорадара тӀехьа кхоачашде дезарех хьоахадир.
