«Цицхолгий бунт» яха спектакль гойтар мехкарча ТЮЗа актёраша
Драматург йолча Хамченаькъан Асета пьесах «Цицхолгий бунт» яха спектакль гойтар берий театра актёраша. Зале гулбеннабар дешархой, мехкара студенташ. Белгалде деза, спектакла чулоацам тахан кхийнарашта довзаш, гарга долча хӏамаех латташ болга.
«Лакха говзал йола, массанена бовза артисташ санна, къонабараш а бар спектакль ловзаеш. Актёрий тоабан юкъе хувцамаш дар. Али яхача принца юхь гойташ хиннар хӏетта волалуш вола актёр Лаьнанаькъан Рамзан вар. Лакха драматически говзал эшаш моттиг яр цо дӏалаьцар.
Хӏаьта къаьстта йоккха моттиг дӏалоацаш дар спектакле Биляй гӏулакх - цицхолгий вахаре лоархӏаме болх лелаберех вар из. Цӏихезача артиста Кӏаценаькъан Батарбика дика ловзаю ала деза из юхь. Геттара хала дола истори, иштта белам, дикача хӏаманга сатувсар чулоацаш никъ бар цо дӏахьош хиннар», - дийцар «Сердалога» ТЮЗе.
Цӏаьрматала, къизала, къайлагӏа леладеча зулама духьалара бунт я ала йиш яр цох. Актёраша гулбеннарашта хьагойтар; ший вахара никъ цӏенача нигатаца, бакъдолча, нийсача хӏаман тӏехьа волаш дӏадахьар мел лоархӏаме да.