Урамашта ӏаьржа хий гаьнадаккха, керда хьоарсам дуллаш латт Шолжа-Шахьаре
Шолжа-Шахьара моттигашка догӏан хиш, иштта лоа дашаш хиш увтташ хилара гӏулакх меттадоаладе арабаьннаб тахан. Хиш хьаӏовргдоацаш болх дӏаболабаьб цига. «Сердалога» из хоам бера шахьара администрацера.
Шахьара Калинина яхача урамгара Пушкина, Энгельса оалача урамашка гӏолла чакхдоалаш Шолжа чу ӏочуотташ хургда 410 метрага кхоача керда хьоарсам. Калинина оала урам чукхийттача моттиге улл, из бахьан долаш тӏоадал эттача хиш хьаӏовш бахархошта хьовзам хул цига. Иштта латкъаш хул догӏаш эттача Энгельса урам тӏара нах а.
Хьоарсам бетонаца тоадаь баьннаб болхлой тахан, Пушкина урам тӏа къахьегаш боахк уж. 30 см шера, 50 см кӏоарга сангар йоаккхаш боахк цига. Дӏахо, бетон ӏочуетта, лакхе аьшка цхарал тӏабилла беза цу тӏа. Шахьара да вола Ӏумаранаькъан Аслан ше ва цига тӏахьожаш. Ара тӏоадал латтача хана, нах бахача моттигашка ӏамарч увтташ хилар чӏоагӏа хало еш хул, цунга хьежжа боаггӏача боараме урамий хьал меттадоаладе лерхӏ Шолже.