Ер бутт чакхбалале, «Даькъасте» яха никъ тоабаь баккха лерхӏ болхлоша
26 километрага кхоачаш бола Р-217 «Даькъасте» федеральни никъ тоабеш боахк мехка 563 - 589 км кхоачаш (Бурокӏалхен юхера доазув чулоацаш). Шозза дӏашербергба цигара никъ – 7,5 метрагара 15 метрага кхоачаш, машинашта дӏа-хьа аха таханарча шиннех биъ оагӏув хургболаш. Машинашта йоккха паргӏато еш хургда из гӏулакх.
«Сердалога» мехкарча Паччахьалкхера бенача хоамах, 20 километрага кхоачача наькъ тӏара болх чакхбаьннаб. Никъ тоабарал совгӏа, Шолжа лакхе гӏолла тӏий дулларгда, иштта Магасера, Эккажкъонгий-Юртара, Илдарха-Гӏалий тӏара наькъаш меттадоаладергда.
Цу моттигашка бахача наьха кхерамзлен хьал меттадоаладара тӏехьа, дӏахьош ба из болх. Наькъа йистошка 6 км кхоачаш гӏашлой никъ булларгба, иштта автобусага хьежарашта совца моттигаш тоаеш, лампаш йогӏаш къахьегаргда. Гонахьа бахача наха машиний тата хала хургдоацаш, лаьрхӏа цу гӏулакха дола сунт оттадергда, наькъа кӏалха гӏолла чакхвала йиш хургйолаш йиъ моттиг къоастаергья.
Ардара бетта дикка къахьийгар болх дӏахьош боахкараша. Наькъа кӏалгӏолла чакхвала аьттув луш йола моттигаш тоаеш боахк тахан. Къаьстта терко ю беррига болх боаггӏача боараме хилийтара.
Ер бутт чакхбалале, беррига болх йистебаккха лерхӏ цига.