Ӏаьлий-Юртарча культуран цӏагӏа топпарах хӏамаш е ӏомалуш ба
Гӏалгӏайчен Наьсарен кхален Ӏаьлий-Юртарча культуран цӏагӏа, топпарах тайп-тайпара гӏирсаш де ӏомалуш хилар дика гӏулакх хинна дӏаэттад. Цига бераша топпарах ший тайпара хоза хӏамаш хьакхолл. Студи ди тӏехьагӏа дегӏайоагӏаш я, доакъашхой тӏакхеташ боагӏа. Цо хьагойт дег чура безам болаш из леладеш хилар, иштта шоай болх дика бовзаш хьехархой хиларо хӏара бера начӏал хьаделл.
«Топпарах хӏамаш яр чӏоагӏа безам тӏабодаш болх ба. Цо еррига берий уйла дӏалоац, царна хеталу шоаш боккъонца бола кхоллама дай болаш санна. Бакъда цох цхьацца хӏамаш хьаеш хилар, из цхьа оагӏув мара яц. Из болх дӏахьош, берашца цхьана дӏахьу дешара балха оагӏув а. Кулгалхочо дувц царна фаьлгаш, иштта довзийт тайп-тайпарча къамий ӏадаташ, царца декъ исторически тамашийна нийсденна хӏамаш. Хӏара доакъашхо, шийна пайда а эцаш, безамца ӏомалу кулгашца куц дола хоза гӏирсаш хьакхолла», - аьлар «Сердало» газетага цу культуран-салоӏама центра кулгалхочо Гӏаьнажанаькъан Мадинас.
Тхоца къамаьл даьчо яхачох, даим цу балхаца хьакхаштабаьнна болх бераш шоай уйлаш а паргӏатаяхара тӏера хул. Нагахьа санна юххьанца уж цу топпарах хӏама хьае кхераш а юхагӏерташ а хуле; ха дӏа мел йода уж хьабоагӏа шоашца цхьацца бола кхоллама ло бахьаш, цар тохаш дола кулг а майрагӏа хул. Кхоллама майралца бехктокхам хилар а хоалуш да. Бераш хьинар долаш, керда балха оагӏонаш лохаш хул.
