Мехкада: Республике юкъера дешар чакхдаккха ловраш хӏара денна дукхагӏа хулаш латт.
Юкъерча профессиональни дешара Ди дездеш ба тахан Россе. Вай мехкарча колледжашка, техникумашка дешаш бола студенташ, хьехархой цу денца даькъалабийцар вай мехкадас Келаматанаькъан Махьмуд-Ӏаьлас.
«Колледже ше вахаре дӏахьоргдола гӏулакх харжа, цхьацца говзал караерзае аьттув ба къонабарий. Россе Президента чӏоагӏонца йоаржаяьча «Кагирхойи бераши» яхача къаман проектага гӏолла колледжашка доккхий хувцамаш деш, кердадараш юкъедоаладеш къахьег оаха тахан. Иштта «Профессионалитет» яха проект йоаржаеш, тахан мехкарча экономикаца эшаш бола говзанчаш кийчбеш терко лоаттаю. Геттара лоархӏаме да, ӏомаде ловш дола хӏама карадерзаде, дийша баьнначул тӏехьагӏа вай мехка болх бе къонабарий аьттув хилар», - белгалдир вай мехкадас.
Кагирхошта вахаре накъадаргдола, пайда эцаргбола гӏулакх ӏомадеш къахьегаш болча хьехархошта доккха баркал аьлар республикан кулгалхочо. Мехкадас белгалдир, кхоана цхьацца моттигаш дӏалаьца къахьега дезача къонабарашта боаггӏача боараме деррига хьалхадаккхар чӏоагӏа лоархӏаме долга. Аьттонца, толамца, хӏара денна шоай дешара гӏулакх дикагӏа тоадеш дӏачакхбалара тӏахьийхар Мехкадас таханара студенташ.
