«Наькъаш цӏенду Ди» яха экоболам дӏахьоргба «Аьрзи» заповеднике
Ӏалама гӏулакхех йолча Президентски ганзо грантаца хьаллоацаш йолча «Кхаь оаг1онца гӏулакх леладеча ООПТ - ӏилма - Волонтёраш» яхача экологически проектага гӏолла, «Аьрзи» Паччахьалкхен ӏалама заповедника доазон тӏа «Наькъаш цӏенду ди» яха экологически болам дӏахьоргба. Ардара бетта 10-ча дийнахьа дӏаяхьа лерхӏаш йола из кхетаче лоархӏаме я къаман культураца, истореца, ӏалама моттигашца дувзаденнараш лорадара тӏехьа.
«Сердалога» тахан культурани туризмаи гӏулакхех йолча Министерствера бенача хоамах, цу оагӏонца керттердар да, ма хулла дукхагӏа адам цу гӏулакха тӏахьехар. Гӏо деш лелараш, гидаш, студенташ, юхе ядача юрташкара бахархой хургба цу юкъе. Нувхех, новкъарле еча кхыдарех уж моттигаш цӏенъеш, лостам беш хургба мехкарча ӏалама моттигех дог лазараш.
Цу гӏулакха хьалхаэттараша из болх боаггӏача боараме дӏагӏоргболаш деррига шоашта дӏатӏаийцад, эшаш бола кхоачам ӏалашбергба цар. Болам дӏахьоча моттиге дӏа-хьа бугаш машин хургья гӏо деш барашта. Болх чакхбаьккха баьлча, цӏенача лоаман фега ӏохайша дӏайхача дуача хӏамах кхетаргба къахьийгараш. Цу юкъе дакъа лаца ловр хьалххе дӏачӏоагӏвала веза.
Проекта хьалха латтача Тиймарзанаькъан Мухьмадага телефон дӏатоха еза - 8 960 432-31-00. Ший мехкарча ӏаламах, Дала хьаеннача хозача моттигех дог лазаш мел вар ва цу юкъе дакъа лаца аравала йиш йолаш.
