«Ноахал 18-35» яхача кхетаченца, болх бе моттигаш хоржа ярмарка хилар
Вай мехка дӏахьош йолча «Ноахал 18-35» яхача Ерригача Россе кхетачен доазон тӏа болх бe моттигаш ӏалашъеш ярмарка дӏайихьар. «Даьхен лорабой» яхача ганза мехкарча филиала болхлой бар цу лоархӏамеча гӏулакха хьалхаэттараш. СВО ветеранаш юкъе хинна кхетачен доакъашхошта болх лахара тӏехьа боккха пайда беш хилар из гӏулакх.
«Цу кхетаче гулбеннабар тӏема операце ветеранаш, хьинаре бола къонабараш, иштта болх бе моттигаш лоаттаераш. Тӏема операце доакъашхошта, къонабарашта массахана къахьегаргдола болх нийсбара, цу оагӏонца гаьнабалара тӏехьа чӏоагӏа лоархӏаме дар из. Даьхен гӏулакхе лаьттарий, цар дезалий аьттув бар болх бе моттигаш ӏалашъеш барашца къамаьл де, деррига цу моттиге тахка. Йоккхача компанешкара, тайп-тайпарча моттигашкара баьхкарашца къамаьл хилар цар. Цу юкъе яр «Беш-Гигант», «Къилбаседа Кавказа доагора-энергетически колледж, МФЦ, МВД, «РИАК» завод, УФССП, АНО «Са бизнес», Минсельхоз, ООО «Газпром межрегион Наьсаре», Госбюро МСЭ, Къахьегама гӏулакхех йола Министерство, мехкара Росгварди», - дийцар «Сердалога» «Даьхен лорабой» яхача ганза мехкарча филиале.
Форуме гулбеннарашта йовзийташ дукха моттигаш яр цига. Мах боацаш цхьацца говзал дикка караерзаеш дола дешар чакхдаккхар мишта хила деза дийцар гулбеннарашта. Дукха нах, шоай аьттув баьннарг лаьрхӏа, дӏабахар цигара.
