Вай мехкара росгвардейцаш-кинологаш куран чемпионате толашагӏбарашта юкъе ба
Жукова орден лелаеча Россе къаман гварде эскаро Даькъастен кинологашта юкъерча чемпионате дакъа лаьцар Зеленокумске. Цига дакъа лоацаш бар Къилбаседа Кавказерча Росгварде, иштта кхыйолча тӏема оагӏонцарча моттигий тоабаш. Вай мехкарча тоабан доакъашхой дикка белгалбаьлар цига.
«Яхьашта юкъе хиннарий кхоачашде дезаш хиннараш дукха дар – шоай балхацарча жӏалешца баьдеча, халача моттиге зуламхой лувцаш, тайп-тайпарча духьаленех тӏехбувлаш, йисача хӏамаех сага лар лехе, саг гучавоаккхаш, аренашка, иштта гӏишлошка, машинашка лелхаш дола гӏирсаш лехаш, къахьегаш бар уж. Котало тоабашта юкъе яьккхар Росгварде оагӏон Жукова ордена Даькъастен къаьсттача декхарех йолча моттига болхлоша, шоллагӏа моттиг кхаьчар лаьрхӏа декхараш кхоачашдеча батальона тоабан тӏемхошта, кхолагӏча моттиге эттар кхерамзлен хьалах, лораварах йолча къаьсттача батальона доакъашхой. Моттигашкарча оагӏон болхлошта юкъе хьалхара моттиг Къарший-Черсий респбликан Росгварде болхлошта елар, шоллагӏча моттиге эттар Нохчий мехкара росгвардейцаш, хӏаьта кхоалагӏа моттиг Гӏалгӏай мехкарча росгвардейцашта кхаьчар», - из хоам «Сердалога» бир Даькъастен Жукова орден лелаеча Росгварде оагӏон зарбан болх лелабераша.
Даькъастерча РФ къаман гварде эскара кинологически балха кулгал деш вола полковник Катаев Евгений вар котбаьннарашта совгӏаташ дӏалуш хиннар. Шоай гӏулакх лакхача говзалца дӏахьош хиларах, доккха баркал кхайкадир эпсара гулбеннарашта. Яхьашка котбаьннарашта, цар биъ кога тӏарча «новкъосташта» кубкаш, лоархӏаме совгӏаташ, грамоташ елар полковника.
