Ха яхача наьха Денца боккхагӏбараш даькъалабийцар вай Мехкадас
Халкъашта юкъерча ха яхача наьха Денца вай мехкара боккхагӏбараш дега йӏовхал йолча дешашца даькъалабийцар мехкадас Келаматанаькъан Махьмуд-Ӏаьлас. Республикан Кулгалхочо белгалдир, ветераний сабарца, хьаькъалца, моллагӏа хӏама боаггӏача боараме диста, къоастаде харца мехка боккха пайда хиннилга, вай къаман исторе уж нах лоархӏаме моттиг дӏалаьца латтилга. Тӏехьа тӏабоагӏарашта из деррига лорадеш, нийсагӏдар хьалхадоаккхаш латта нах ба уж.
Дикка ха яха болча къоаношта къаьстта терко е езилга теркалдир Мехкадас. 90 шерал тӏехваьнна 2 500 саг ва республике. Шоай вахар Даьхенна хетадаь, къаман беркате ӏадаташ, гӏулакхаш, истори лорадеш хьабаьхка, дукха дайна, лайна нах ба уж.
«Вай ха яхача наьха паргӏатта, дега ма хетта салаӏа, ха дӏаяхьа, дегӏа могашал меттаоттае аьттув хургболаш, ветераний Цӏагӏа доккхий хувцамаш деш, эшаш мел дар ӏалашдаьд. Наьсарен кхален эггара хозагӏа йолча моттиге Сурхо тӏа улл из. Россе Президента чӏоагӏонца йоаржаяьча «Боккхагӏабараш» яхача федеральни проекта «Дезал» яхача къаман проектага гӏолла дӏабихьаб из болх. Къаьстта гӏадвугаш да вай ветеранаш чӏоагӏа раьза, дега тоам хинна хилар. Вай хӏама тоалуш латтара белгало хиларах, геттара лоархӏаме да сона из. Бакъда ший цӏагӏарча, гонахьарча наьха йӏовхалал, безамал, массахана терко еш хиларал лакхагӏа хургдац цхьаккха а. Ха яхача нахага боаггӏача боараме хьожаш хилар цу гӏулакхашкара долалуш да. Массахана царна терко лоаттаеш, хозача гӏулакхашца, безамеча, кӏаьдача дешаца цар дог хьоасташ, уллув долаш хила деза вай», - аьлар Мехкадас.
Могаш, маьрша болаш, иразе, беркатаца баха даькъалабийцар республикера ха яха бахархой Мехкадас. Цо теркалдир, уж нах массахана шоай дезалий, мехкарий, къонгий тӏехьений терко йолаш; цар безама, дегай йӏовхала юкъе хиларах дог тийша ва ше, аьнна.
