Наьсарерча подстанце Россе хьадаь «хьаькъале» гӏирсаш оттадергда «Даькъастен Россеташа»
Наьсарерча подстанце, тока къаьнарча, даьттацарча гӏирсашта меттел, тахан хьадаьнна российски толашагӏдараш оттадеш болх дахьоргба «Даькъастен Россетий» - «Ингушэнерго» филиала болхлоша.
Наьсарерча, иштта Той-Юртарча, Долакха-Юртарча 49 эзар гаргга бахархой, 73 вахаре лоархӏаме йолча моттигашкара тока хьал меттадоаладеш, проект я ала деза цох тахан.
15,3 млн сом ахча да цу гӏулакхо дӏалоацаргдар. 1966-ча шера, 2001-ча шера подстанце оттадаь уж гӏирсаш хувца дезача хьале кхаьча дикка ха я: даьтта боарам лорабеш даиман тахьежа везаш, каст-каста кулг тоха дезаш, хулар уж.
Хӏаьта керда, российски гӏирсаш тока саьргашца моллагӏа хатар хилча, секунд ялалехь ток шоаш ӏойоаеш да. Из чӏоагӏа лоархӏаме да дукха мах бола трансформатораш цайохийтара тӏехьа.
Вакуумни оала гӏирсаш цӏи ца ялийтара а дикагӏа, чӏоагӏагӏа лоархӏаш да: царна чухьнахьа доагор дац, хӏаьта трансформаторни даьтта лаьтта ӏоцаахара, ӏалама зенедараш ца даржара тӏехьа дика лоархӏаш да из.
Цул совгӏа, «хьаькъалерча» блокашка хьежача гуш хул, тока хьал мишта латт. Дерригача хӏамай боарам шоаш бисте, диспетчерий пульта тӏа хьаоттаду цар дар. Цу гӏулакхо, юхе веце а, тока моттига доал де аьттув лу.
«Керда, толашагӏа дола гӏирсаш оттадаро укх шерарча ӏай дикка меттадоаладе аьттув лургба Наьсарерча, Той-Юртарча, Долакха-Юртарча моттигий тока хьал», - белгалдир «Даькъастен Россетий» – «Ингушэнерго» филиала хьалха латтача Котаганаькъан Кемрана.
2026-ча шера «Ингушэнерго» филиала дахьоча программан юкъе да уж хувцамаш. Лайчилла бутт чакхбалалехь, беррига болх йистебаккха лерхӏ тока оагӏон къахьегамхоша.
