ИнгГУ дӏайихьар Россе Банка ахчан-кредита политиках йола сесси
Гӏалгӏайчен паччахьалкхен университета библиотека ӏилман даькъ тӏа дӏайихьар Россе Банка коммуникационни сесси. Цига дийцар ахчан-кредита политикан керттера дешаш. Кхетаче дӏахьош дакъа лоацаш вар Гӏалгӏайчен Паччахьалкхен Председатель Сластенин Владимир, Россе Банка ахчан-кредита политикан Департамента кулгалхо Ганган Андрей, ГӏР гӏолла йолча Къаман банка кулгалхо Зайцев Вадим.
«Цига ладувгӏаш бар моттигера вахар ӏалашдара ӏаьдала кулгалхой, банка, бизнеса викалаш, ӏилманхой-экономисташ, юкъарлон викалаш.
Царех цхьабараш онлайн кхетаче дӏахьоча дакъа лоацаш бар. Сессена керте вар Ганган Андрей. Цо дийцар, Россе Банка малагӏа дешаш леладу, ахчан мах божара ӏаткъаш дар фуд.
Ардара бетта 23-ча дийнахьа, Россе Банка директорий Совето 14% боарам чӏоагӏбаьб. Ардара бетта 19-ча денга кхоачаш, мехка гӏолла ахчан мах божара хьал 6,8 % да. Россе Банк сатувсаш я, 2027 шера из 4% боарамга кхоачаш хиларга.
Сластенин Владимира белгалдир, цу тайпара вӏашагӏкхетараш хилар бахьан долаш; бизнеса, финансай организацешта юкъера бувзам чӏоагӏлу, аьнна. «Предпринимателашта лоархӏаме да керттерча ставках тӏаэцаш долча хаттарий маӏан довзар. Кхы кӏезигагӏа доацаш лоархӏаме да, цу хьала мах оттабеча хана республикан предприятеш малагӏча хьалашка болх я дӏалархӏар»,- аьлар Гӏалгӏайчен Паччахьалкхено. Цо яхачох, цу тайпарча кхетаченашка предпринимателий шоай хаттар дала йиш я Россе Банка викалашка, иштта шоашта хьалхашка нийслуча халонех дувца а», - аьлар цо дӏахо «Сердало» газетага.
Гӏалгӏайчен Паччахьалкхе, республикан Россе Банка оагӏув цхьана дегӏадоаладеш я ахчан а банка а хьалаш, ахчанцарча балхах дика кхеташ хилар. Сластенин Владимира белгалдир, цу балха дика толам ба, кара доаца ахча леладе йиш хилар. Нагахьа санна ворхӏ шу хьалха карташ леладеш кӏеззига мара нах хиннабеце, тахан беррига къахьегамхой алапи шоай карта тӏа хьаийдеш ба.
Вӏашагӏкхетар дӏахьош, шоллагӏча даькъе дийцар шоай доалахьара хӏама леладершка кредиташ хьакхоачаш хилар, ахчан мах божар, МСП лакха йолча моттигашкара балха хьалаш. Зайцев Вадима яхачох, Гӏалгӏайчера шера ахчан мах божар дӏалаьрхӏача, тов беттага кхоачаш 6,1 % я (Россе гӏолла йолчул лохагӏа 6, 35%), мах бара хьал лакхдалар 4,8%, хӏаьта 87% корпоративни кредиташ регионе дукхагӏа кхоач зӏамигача, юкъерча бизнеса.
Юххера а, доакъашхоша онлайн - хаттараш дир ахчан мах божара даькъ тӏа - уж хоамаш дӏалоархӏаргда Россе Банка, оагӏой бетта 18-ча дийнахьа, ше керттерча ставка хаттар тӏаэцача хана.