СВО ветеранаш хьаллаца, «Фермерий Ишкол» яха болх вӏашагӏбеллар
«Даьхен лорабой» Паччахьалкхен ганза моттигерча филиало аларах, Гӏалгӏай мехка боахамашта юкъера кхетаче дӏайихьар. Цига дийца керттера дош дар «Фермерий ишкол» яха бӏухошта лаьрхӏа дешара проект дӏайолаяр. Из дош дувцача дакъа лоацаш вар «Даьхен лорабой» ганза филиала кулгалхо Абаьданаькъан Ислам, цун хьалхара гӏонча Исмейланаькъан Ислам, «Россельхозбанка» АО оагӏон кулгалхой, иштта республикан юртбоахама Министерствон кулгалхой, «Са бизнес» яха центр.
«Сердало» газетага ма аллара, цига керттера терко тӏаяхийтар лаьрххӏача тӏема операце бӏухой вахара даькъе меттаоттабара оагӏув хьаллацара. Кхетачен юкъара декхар дар боахамашта юкъера бувзам лелабар. Из хилар бахьан долаш, бӏухой таро хургья ахархой бизнесе шоай хӏама дӏадахьа - дешаргара, кхелахой хьехамашкара, аьттув лу кредиташ эцарга кхаччалца.
«Даьхен лорабой» ганза филиала кулгалхочо Абаьданаькъан Ислама белгалдир, дешар чакхдаьнначул тӏехьагӏа цхьаккха а ший проекташца юстара вусаргвац. Цо яхачох, хӏанз банкаца, министерствошца, центрашца вӏашагӏболлаш ба ший доалахьара хӏама дӏадоладеш вола саг хьаллацара бола болх.
Шоай кхетачен чаккхе еш, цар барт бир СВО бӏухоех ладувгӏара тоаба вӏашагӏйолла. Кхетачен доакъашхоша шоаш тешаш ба аьлар; денал долча, халонашта духьалъотта могаш болча бӏухоша республикан юртбоахам дегӏабоалабара шоашкара дика дакъа юкъедахьаргда аьнна. Цу лостамагӏа долча боахамаша царна новкъостал лоаттадергда.