Берашта бокъонашцара гӏо деча Дийнахьа, Илдарха-Гӏалий тӏа хьехама майда хьаелларгья
Лайчилла бетта 20-ча дийнахьа Россе дӏахьоргда, берашта бокъонашцара гӏо лоаттаду Ди. Из болам хьаллоацаш, болх боаржабе лерхӏ Илдарха-Гӏалий тӏарча администраце цу оагӏонцарча моттиге. Мах боацаш гӏо деха тӏабаха йиш йолаш ба цу дийнахьа кагирхой, цар даьй, ноаной, берашта тӏахьожараш, иштта бер хьаэца безам бола дезалаш.
«Берий бокъонаш лораяра, лархӏара тӏехьа дӏахьош болх ба ала деза цох; цул совгӏа, бахархошта а цу оагӏонца дувзаденнараш дикагӏа довзаргда. Мах боацаш гӏо дергда къаьстта терко эшарашта: бойла дисача берашта; даь, наьна доал доацаш бисарашта», - дийцар «Сердалога» шахьара администраце.
Берашта терко лоаттаеча оагӏон болхлоша юридически оагӏонцара гӏо дергда цу дийнахьа, хьатӏабаьхкарий хаттараш доашхаргда, берий массайолча оагӏорахьара бокъонаш лораяра тӏехьа, бера доал оттара, иштта алименташцарча гӏулакхаца, дезала юкъе нийслуш долча цатоамашца, къовсамашца, дукха бераш дараша шоашта доагӏар хьадехарца - дувзаденна лоархӏаме дола хаттараш да цига белгалдергдараш. Илдарха-Гӏалий тӏарча администраце актови зале, 11 сахьатагара 3 сахьат даллалца, тӏаийбергба нах. Телефон: 8 (928) 098-00-71.