Лорий институт яьккхача 130 сага дипломаш хьаийцар
ГӀалгӀай паччахьалкхен университете, лорий институт яьккхараша дипломаш хьаэцаш, цӀай дар. 130 лорага хьежаш латт къаман вахарера лоархӀаме гӀулакхаш. Наха могаш дола гӀо деш, цар хьал аттачахьа доаккхаш къахьега чӀоагӀо йир цар, дипломаш дӀаэцаш.
«Боккхача новкъа баьнна, ординатура яккха езаш ба уж дӀахо. Шоай лорий кхетам лакхбергба цар цу оагӀонца. Мехкарча цӀихезача дарбанчешкара болх бовза, дуккха кердадараш, шоай наькъ тӀа эшараш Ӏомаде аьттув баргба цар ординатура йоаккхаш»,- дийцар «Сердалога» университете.
Клинически ординатура яхача оагӀоно лорашта аьттув лу, Ӏилман тохкамаш де, цхьацца лазараш даржаргдоацаш керда болх вӀашагӀболла, иштта кхыдараш. Цу тайпарча Ӏилман балхашка белгалбала, лакхаленашка кхача тарлу вай университетера арабаьннараш. Дипломаш хьаийцачул тӀехьагӀа, дӀахо Ӏомадечо дикка тоабергба цар балхацара кхетам.
