«Даьй оазаш» яха хьалхара аудиоспектакль хургья укх бетта 19-ча дийнахьа Магасе
17.04.2025 10:45
Укх бетта 19-ча дийнахьа Магасерча Аланой доазон тIа гойтаргья эггара хьалхара гIалгIай этнически аудиоспектакль «Даьй оазаш». Из болх кийчбаьр - театра, кино гIулакхех йола Магасера моттиг. «Сердалога» из хоам бир культуран гIулакхех йолча Министерствос.
«Ширача вай даьй оаламий дунен тIа кхачар да «Даьй оазаш». Лакха начIал долча актёраша дIахьоргба из болх», - дийцар министерстве.
Спектакль йолаялалехь, 11 сахьат даьлча, дIахьоргья вай мехкарча даараш кийчдарах болча говзанчий ярмарка; хIаьта нийса кхо сахьат даьлча, гIалгIай багахбувцамах йолча викторине дакъа лоацаргда гулбеннараша, ворхI сахьат даьлча гойтаргба товрашцара тIом, бархIлагIчох ах даьлча йолалургья спектакль «Даьй оазаш».
