ГӀалгӀайчен «Даьхен Лорбой» яхача ганза филиале 2007 дехар денад
«Даьхен Лорбой» ганза филиала дийцар «Сердало» газетага, 15 бетта шоаш баьча балхах. Цу юкъа бахархошкара 2007 дехар кхаьчад тӀема доакъашхошкара, Донбассе дӀахьош йолча Россе лаьрххӀача операце бейнача доакъашхой дезалашкара, иштта тахан цига тӀема мугӀарашка латтарашкара, цар дезалашкара.
«ДукхагӀа дола дехараш оаха царна дика новкъостал дарца техкар. Хаттарашта юкъе дукха дар лаьтта дехаш яздаь хинна каьхаташ (451), ахчанца новкъостал дар дехаш (134), лорий новкъостал дехаш (114), психологически новкъостал (384), санаторно-курортни дарба дехаш (79). Наха иштта, деша отташ новкъостал дехаш, дукха каьхаташ язду тхога, коммунальни хьалаш, балха оттавар дехаш дола каьхаташ а хул», - аьлар тхоца къамаьл даьчо.
ГӀалгӀай мехка даим теркама юкъе лоаттаду СВО доакъашхошта, цар дезалашта гӀо дарах дола дешаш. Вахара гӀо дара чудоагӀаш да льготаш, ахча хьадалар, кхыдараш.
