ГӏалгӀайчен тоабан Владикавказерча яхьашка йиъ майдилг елар
15.10.2025 21:27
Владикавказе дӀахьош хиннача, олимпийски чемпиона Мусульбес Давида цӀерагӀча Ерригроссийски яхьашка, ГӏалгӀайчен тоабо йиъ майдилг яьккхар, яхаш, хоам бу «Сердало» газетага вай республикан спортивни латара Федераце.
Яхьаш дӀахьош, Россера, Казахстанера, Словакера, ГӀуозлойчера, Эрмалой мехкара, ГуржегӀара, Болгарера 300 совгӀа спортсмен вар дакъа лоацаш, цар таро яр коталон моттигаш яха, шоай профессиональни говзал гойта. Яхьа доакъашхой хилар 16 шерга кхаччалца ха яьннараш. Дарсиганаькъан Мухьмад-Амин (38 кг), Олмазанаькъан АбдуллахӀ (41 кг), Олмазанаькъан Ахьмад (44 кг), вай мехка сий доаккхаш, цар яьхар дото майдилгаш. Пхьиленаькъан Хьамзата кхоалагӀа моттиг яьккхар дозал 48 кг долаш», - аьлар хоамо.
