Москверча дарбанче чакхдоаккхаргда вай мехкара ДЦП дола 8 бер
12.05.2025 00:03
ДЦП долча берашта гӀо лоаттадеш ва, РФ Паччахьалкхен Дума депутат вола БӀарахой Бек-хан. Укх наькъа а вай мехкара цу лазарах дола бархӀ бер шоай ноаношца Москверча дарбанче чакхбаргболаш вӀаштӀехьадаьккхар цо.
«УнахцӀенонга бода никъ» яхача боламга гӀолла дӀахьош да из беркате гӀулакх. Цига мел долхача хана, совгӀаташ лу берашта (планшет, карта, телефонацеи планшетацеи болх беча хана лергехйоахкоргаш), цар ноаношта 200 000 ахча лу депутата.
«Цу оагӀонцара болх иштта дӀахьош латташ ба. Могаш дола гӀо даь, берий вахар тоаде хьажа деза вай. ХьатӀабоагӀача шин бетта цига дахийта лаьрхӀача берий гӀулакхага хьожаш да тхо, дӀахо а лоаттадергда новкъостал», - дийцар «Сердалога» республикерча юкъарча балха новкъостала штабе.
