Наьсарен кхален администраце новкъостал дергда зе хиннача дезала
Тахан Наьсарен доал деча даькъ тӏарча администраце кулгалхочун гӏонча йола Паражанаькъан Роза, кхувш боагӏарий гӏулакха йолча комиссе болхлочунца Йовлой Рамзанаца, яха хилар берий республикан клинически дарбанче, цига да карарча хана Эккажкъонгий-Юрта бахача наьха шоай доалахьарча цӏагӏа цӏи яларах човнаш хинна бераш. Цох дийцар «Сердало» газетага доал деча даькъ тӏа.
Белгалду, лайчилла бетта 21-ча дийнахьа, Первомайски урам тӏа доалахьарча цӏагӏа цӏи яьлар, цига човнаш хилар кхаь бера, цаӏ делар.
Лораша яхачох, лозадаьча берий могашал хӏанз дикагӏа я. Лораша оттабаь лазара корта - доагора гӏирсах човнаш хилар.
«Кхален администраце из хьал теркама юкъе лоаттаду, из иштта кийча я цу дезала эшаш дола новкъостал де. Из ерригача республиканна вас еш моттиг я», - аьлар Наьсарен кхален администраце.
